Adoleshentja e cila filmoi momentet e fundit të jetës së afro-amerikanit George Floyd, të cilit polici i Minneapolis ia kishte vendosur gjurin në qafë dhe ia mbajti për afro 9 minuta, ka folur për herë të parë para mediave në prezencë të avokatit, duke pretenduar se kurrë nuk kishte menduar që me këtë veprim të bëhet heroinë, duke mos e ditur për ndikimin në mbarë botën që mund ta ketë videoja e saj.
Darnella Frazier, 17-vjeçe, po ecte me kushërirën e saj 9-vjeçe të cilës kishte dalë për t’i blerë çokollata, kur pa katër policë duke e nxjerrë me dhunë nga vetura një afro-amerikan, transmeton Telegrafi.
“Ajo nuk kishte ide se do të jetë dëshmitare, dhe se do të dokumentoj një nga vrasjet më të tmerrshme në historinë e SHBA-ve dhe atë nga një zyrtar policor”, tha avokati i Darnellas, Seth Cobin.
“Po t’i kishte munguar guximi, vendosmëria dhe dëshira e madhe për ta treguar të vërtetën, zor se do të publikohej videoja në Facebook e cila u shpërnda në mbarë botën, ku shihen katër zyrtarë policorë duke qëndruar pranë tashmë të ndjerit Floyd.
Darnella pranoi se kurrë nuk do ta kishte besuar se me telefonin e saj do të kapte momentet e fundit të jetës së George Floyd, duke pretenduar se këtë veprim kurrë nuk e ka bërë për ta fituar epitetin e heroinës.
“Bota ka nevojë të shoh atë çfarë kam parë unë. Gjëra të tilla kanë ndodhur në qetësi plotë shumë herë më parë. Nuk e kam bërë që të më quajnë heroinë”, ka shtuar ajo./Telegrafi/
