Komandanti i Forcave të përbashkëta të NATO-s, admirali James G. Foggo, nuk është i shqetësuar për stabilitetin në Kosovë dhe thotë se “NATO respekton neutralitetin e Serbisë dhe lidhjet e saj politike dhe ushtarake me Rusinë”.
Admirali Foggo i tha Radio Televizionit Serbisë se “NATO e shpreh qartë dëshirën për zgjerim në rajon, por që nuk ka konflikt interesi”.
“Ne jemi në Partneritetin për Paqe, dhe kjo është e shkëlqyer. Në Statutin e Aleancës shkruan se një sulm ndaj njërit prej anëtarëve është sulm mbi të gjithë. Megjithatë, misioni i NATO-s është, para së gjithash, mbrojtja dhe parandalimi i konflikteve. Pranimi i Malit të Zi i ka kontribuar sigurisë së kufijve të rajonit”, tha Foggo, përcjell Telegrafi.
I pyetur nëse NATO do ta kryejë mirë punën e saj kur bëhet fjalë për sigurinë në Kosovë dhe rajon, Foggo tha se më shumë se 4,000 ushtarë të KFOR-it “po i kryejnë shumë mirë detyrat për garantuar sigurinë”.
“Për këtë siguri, në radhë të parë është kompetente Polica e Kosovës, pastaj EULEX-i dhe KFOR-i. Detyra e tyre është të parandalojnë destabilizimin dhe dhunën”, tha Foggo.
Në konstatimin se Departamenti i Shtetit paralajmëroi amerikanët për sigurinë në Kosovë dhe në Bosnjë e Hercegovinë, i cili u pasua nga vrasja e Oliver Ivanoviqit, Foggo vuri në dukje se bëhet fjalë për një krim që duhet të dënohet, por që nuk është i shqetësuar për stabilitetin në Kosovë.
“Vrasja e Oliver Ivanoviqit është një krim, autorët e të cilit duhet të gjykohen. Presidenti i Serbisë Aleksandar Vuçiq ndjeshëm e ka qetësuar situatën pas këtij rasti, me vizitën e tij në Kosovë. Kjo i kontribuoi edhe përcaktimit për të vazhduar dialogun në mes të Beogradit dhe Prishtinës. Departamenti i Shtetit herë pas herë lëshon paralajmërime të sigurisë edhe për pjesë të tjera të botës. Nuk jam i shqetësuar për stabilitetin në Kosovë. Nesër do të shkoj atje”, përfundoi Foggo. /Telegrafi/