Adidas, kompania gjermane është duke e shitur Reebok tek Authentic Brands Group (ABG) për 2.1 miliardë euro (2.5 miliardë dollarë).
Adidas bleu kompaninë britanike në vitin 2006 për 3.22 miliardë euro në mënyrë që të konkurronte me rivalin e saj më të madh Nike, por për shkak të performancës së dobët të markës, investitorët i bënë presion për ta shitur, shkruan reuters.
Ndërkohë, Adidas ka arritur të shkurtojë dominimin e Nikes në Shtetet e Bashkuara me markën e vet, me ndihmën e bashkëpunimeve me të famshëm si Kanye West, Beyonce dhe Pharrell Williams.
Reebok do të mbajë selinë në Boston dhe do të vazhdojë operacionet në Amerikën Veriore dhe Latine, rajonin e Azi-Paqësorit, Evropën dhe Rusinë.
ABG ka mbledhur më shumë se 30 marka gjatë 11 viteve, të cilat shiten në 6,000 dyqane. Markat e saj përfshijnë zinxhirët e veshjeve Aeropostale dhe Forever21, si dhe revistën Sports Illustrated. /Telegrafi/