Ministri i Arsimit dhe Shkencës, Arbër Ademi ka thënë se është në pritje të një përgjigje nga Sindikata e Arsimit, Shkencës dhe Kulturës (SASHK) mbi propozimin për rritjen e pagave të arsimit prej 10% deri në prill të vitit 2020.
SASHK-ut iu propozua më 8 tetor në një takim të Qeverisë midis Kryeministrit Zoran Zaev dhe Ministrit Ademi me liderin e SASHK-ut, Jakim Nedelkov. Sindikata ka thënë se ata do të përgjigjen pasi të kenë marrë mendimet e anëtarësisë përmes organizatave të tyre rajonale. Vendimi përfundimtar pritet të merret në një mbledhje të Këshillit të SASHK-ut këtë të premte.
“Unë pres një përgjigje përfundimtare nga SASHK, kështu që le të ulemi së bashku, sepse vetëm përmes dialogut do të arrijmë një zgjidhje, ndërsa dialogu nuk mungon. Kemi dialog të shkëlqyeshëm shoqëror. SASHK është një nga partnerët tanë kryesorë në hartimin e politikave dhe reformave dhe gjatë zbatimit të tyre. Ne do të jemi në komunikim dhe me dialog të arsyeshëm do të mund të gjejmë një zgjidhje për çdo sfidë. Rritja nga muaji prill të propozuar nga qeveria është miratuar dhe si informacion në një seancë qeveritare. Ne kemi kontribuar në rritjen më të lartë historike të pagave në arsim deri më tani”, u tha ministri Ademi gazetarëve përpara një takimi të grupit punues për konceptin e arsimit gjithëpërfshirës.
Në deklaratën e parë për propozimin e qeverisë, kryetari i SASHK-ut Nedelkov tha që sipas reagimeve fillestare, anëtarët nuk ishin të kënaqur që rritja do të ishte 10%, dhe jo 25% siç kërkuan. Ata gjithashtu konsiderojnë se rritja duhet të jetë nga 1 janari, jo nga prilli./Telegrafi/