Amir Abrashi ka dëshpëruar tifozët e Manchester United duke thënë se përforcimi i tyre i ri, Paul Pogba, ka një dallim të vogël me futbollistët shqiptarë.
Amir Abrashi ka treguar në një intervistë për “Badische Zeitung” se çfarë ka mësuar nga pjesëmarrja në Euro 2016 dhe se tashmë ishte i ndërgjegjshëm se mund të luante si i barabartë ndaj çdo kundërshtari, pavarësisht vlerës së kartonit.
Futbollisti ka zbuluar se dëshironte si kujtim fanellën e Antoine Griezmann, pas ndeshjes ndaj Francës, por kishte përfunduar me atë të Payet, pasi ylli francez i Atletico Madrid e kishte refuzuar mesfushorin kuqezi, përcjell “Panorama”.
Abrashi, çfarë bën një futbollist profesionist gjatë një Europiani, përveç stërvitjes dhe ndeshjeve?
SInqerisht, jo edhe aq shumë. Ne kishim qendrën tonë në një qytezë të vogël në Bretanjë. Për arsye sigurie, gjithçka ishte e mbyllur. Ne pamë vetëm hotelin, fushën stërvitore dhe stadiumet nga brenda. Ndërsa ndeshjet e tjera i shikuam në TV.
Çështja e terrorit, a ishit të frikësuar?
Në fillim kishte një ndjesi të çuditshme. Por me kalimin e kohës pamë se çfarë masash sigurie ishin vendosur, të paktën për ne lojtarët. Prindërit e mi më thanë se ata kishin hyrë në stadium pa ndonjë kontroll të rreptë sigurie. Kjo më bëri shumë përshtypje.
Si është të luash kundër yjesh si Paul Pogba dhe Antuan Grizmann?
Interesante, sidomos kur kujton shifrat e kartonëve të transferimit për lojtarë të tillë. Fillon e mendon: Hej, nuk paskemi edhe aq shumë diferencë. Kur Grizmani luajti kundër nesh, në fillim nuk më ra në sy. Derisa shënoi golin. Atëherë thashë: Po tani e gjeti të luajë ky. Por, diferenca me Pogba e Griezmann nuk ishte aq e madhe.
Çfarë keni marrë nga Evropiani? A janë fanellat e kundërshtarëve ende suvenirë popullorë mes lojtarëve?
Unë kam një të Dimitri Paje nga Franca. Ma dha menjëherë kur ia kërkova. Ndryshe nga Grizman. Ai më tha se i duhej për familjen e tij.
A kishte ndonjë shpërblim tjetër?
Ne morëm pasaporta diplomatike nga Presidenti i Shqipërisë, pasi kemi bërë krenar të gjithë kombin.
Çfarë përfitimi ke nga një pasaportë diplomatike?
Unë ende nuk e di (qesh). Të paktën në Shqipëri nuk do të na ndalin më aq shumë në kontrolle.