Deputeti i LDK-së, Lumir Abdixhiku, që është edhe kryetar i Komisionit për Buxhet dhe Financa në Kuvendin e Kosovës, ka thënë që do ta ftojë në raportim ministrin e Financave për shpenzimet e parave të shtetit.
Përmes një shkrim në Facebook, Abdixhiku ka përmendur disa prej shpenzimeve që janë bërë nga institucionet muajt e fundit.
Ndër të tjera, ai ka përmendur edhe ‘500 mijë euro për librin e Presidentit’, shpenzim për të cilin u raportua ta ketë bërë Presidenti Hashim Thaçi për librin biografik të shkruar nga dy autorë ndërkombëtarë.
“Një milion për pagesën e rrymës në Veri, 500 mijë euro për librin e Presidentit, 550 mijë euro për vitin e Skenderbeut, 700 mijë euro për shënimin e pavarësisë. Ende pa kaluar 3 muaj, shpenzohet rezerva e shtetit për këtë vit. Miliona të shpërndara me lehtësi, pa prioritet e pa respekt ndaj gjendjes ekonomike në vend. Do ta ftoj Ministrin e Financave në raportim, për të parë se si dhe ku janë shpenzuar mjetet e rezervës këtë vit”, ka shkruar Abdixhiku. /Telegrafi/
