Kryetari i Lidhjes Demokratike të Kosovës, Lumir Abdixhiku ka akuzuar Qeverinë Kurti për dhënien e tenderëve, sipas tij, me negocim të drejtpërdrejtë.
Në një reagim në Facebook, Abdixhiku thotë se janë 781 tenderë që janë dhënë me negocim të drejtpërdrejtë.
“Plot 781 tenderë, në vlerë prej 209 milion eurove, janë dhënë nga “Pushteti i Shpresës” me negocim të drejtpërdrejtë! Pa procedura, pa konkurrencë, me muhabet të drejtpërdrejtë! Pra, e thërrasin një biznes që e zgjedhin vet, dhe i japin tender! Kaq thjeshtë! Nuk ka garë, nuk ka çmim të lirë, ka marrëveshje një me një”, thotë ai.
Kreu i LDK-së shton tutje se “Kështu janë ndarë plot 209 milion euro; 781 herë! 30 milion vitin e parë; 70 milion në të dytin, 109 në të tretin. Sa më gjatë në pushtet, aq më i mësuar zanati”.
Më tej, ai ka treguar se në KEK janë dhënë 13 tenderë.
“Në KEK, 13 tenderë me negocim të drejtpërdrejtë, i janë dhënë një biznesi të njëjtë. 13 herë, pa procedurë, pa konkurrencë, me zgjedhje të drejtpërdrejtë 6 milion euro biznesit të njëjtë. Jo një herë, jo dy herë, jo tre herë por plot 13 herë”.
Gjithashtu, ai ka folur për tender që sipas tij, janë dhënë në Ministrinë e Punëve të Brendshme.
|Në Ministrinë e Punëve të Brendshme, për shërbime të IT-së, 15 milion euro me negocim, pa procedurë e pa konkurrencë, i janë dhënë një biznesi me një tender. Plot 15 milion euro me muhabet të drejtpërdrejtë; në një fushë me dhjetra biznese me shërbim të njëjtë”, thotë mes tjerash ai.
Abdixhiku thotë se të vërtetës nuk mund t’I ik askush.
“Debatit në Kuvend i ikën; lëshuan sallë, por të vërtetës nuk kanë nga t’i ikin! Këto, dhe kontratat tjera njëburimore, do t’i trajtojmë ditët në vijim. Në Kuvend dhe jashtë tij; le të kuptojmë se si prapa perdes së popullizmit dhe arrogancës së të paprekurit fshihet një tenderomani selektive dhe sistematike si asnjëherë më parë”, përfundon reagimi./Telegrafi/
