Aleanca për Ardhmëninë e Kosovës me shqetësim të madh ka përcjellë vendimin e Qeverisë së Kosovës, të 15 korrikut, 2009, për kushtet dhe kriteret e ndërtimit të kapaciteteve të reja energjetike në Kosovë, në kuadër të Projektit “Kosova e Re”.
AAK vlerëson që ky vendim ka mangësi të shumta procedurale, është shquar me një nguti dhe jotransparencë ndaj qytetarëve të Kosovë, me injorimin e plotë të rekomandimeve të komunitetit të ekspertëve të kësaj fushe, dhe për më shumë, në bazë të njohurive të para, nuk garanton që ndërtimi i “Kosovës së Re” do të ndihmojë, në mënyrë thelbësore, zhvillimin ekonomik të Kosovë.
"Qytetarëve të Kosovës dhe ekonomisë kosovare, u nevojitet një furnizim i pandërprerë me rrymë elektrike. Por, gjithashtu, qytetarëve të Kosovës, “Kosova e Re” i duhet edhe si një gjenerator i përparimit ekonomik dhe i krijimit të kushteve më të mira sociale – gjë e cila nuk sigurohet me Propozimin e prezentuar nga Qeveria e Kosovës, me 15 korrik, 2009", thuhet ne nje komunikate te kesaj partie.
AAK është e mendimit që vendimi i Qeverisë së Kosovës është në kundërshti me Kornizën afatmesme të zhvillimit të sektorit energjetik, të miratuar në Kuvendin e Kosovës./telegrafi/