Në Kuvendin e Kosovës ka filluar seanca e jashtëzakonshme ku në rend dite është votimi i mocionit të iniciuar nga LDK-ja për rrëzimin e Qeverisë të udhëhequr nga Albin Kurti.
Në përkrahje të këtij mocioni tashmë ka dalë edhe Aleanca për Ardhmërinë e Kosovës.
Në argumentet që kjo parti ka renditur se përse do ta votoj mocionin e mosbesimit, thuhet se AAK asnjëherë nuk ka besuar se kjo Qeveri do ta ketë stabilitetin politik dhe jetëgjatësinë kushtetuese.
“Pozicioni ynë pro mocionit bazohet në pesë dështimet e kryeministrit Kurti: Arsyeja kryesore e mbështetjes së mocionit të mosbesimit për Qeverinë Kurti është se Albin Kurti qëllimshëm ka provokuar rrëzimin e Qeverisë në një kohë krize të rëndë për vendin shkaku i pandemisë së coronavirusit”, thuhet në argumentet e AAK-së.
Ende nuk dihet se cili do të jetë rezultati i seancës së sotme, ku tashmë shumica e deputetëve janë prezent. /Telegrafi/
