Ministria e Punës dhe Mirëqenies Sociale (MPMS) ka nënshkruar marrëveshje me organizatën qeveritare gjermane GIZ, ndërmarrjen sociale Diakone (nga Gjermania) dhe Agjencinë për përkrahjen e punësimit në Kosovë (APPK) për aftësim profesional dhe punësim në Gjermani të 54 të rinjve nga Kosova.
Ministri i Punës dhe Mirëqenies Sociale, Arban Abrashi, tha se përpjekjet disamuajshe më në fund u kurorëzuan me sukses.
“Kjo ndryshe quhet ‘win-win’, që do të thotë se përfitimi është i shumanshëm. Kjo nënkupton se ndihma dhe përkrahja e të rinjve do të jetë gjithmonë prioriteti ynë. Ne si ministri e kemi përkrahur këtë proces që nga fillimi, andaj përvojat e mira gjermane të rinjtë t’i sjellin në Kosovë”, tha Abrashi.
Përfaqësuesi i ndërmarrjes sociale gjermane Diakone, Johanes Flothow, e ka vlerësuar të suksesshëm trajnimin e të rinjve të përzgjedhur, të cilët do të shkollohen dhe punësohen në Gjermani, duke thënë se kanë kërkuar njerëz të motivuar për këtë.
Ndërkaq, përfaqësuesi i GIZ-it, James Macbeth, ka falënderuar partnerët që kanë kontribuar në implementimin e këtij projekti, në veçanti institucionet të cilat kanë shprehur gatishmëri t’i ndihmojnë dhe t’u japin mundësi këtyre të rinjve./Telegrafi/