Pjesa dërrmuese e popullsisë në Shqipëri është e punësuar në sektorin e bujqësisë. Është ky një ndër përfundimet e Anketës së Forcave të Punës, zhvilluar nga Instituti i Statistikave. Nga anketa rezulton se 44.7 për qind e të punësuarve në vendin tonë janë në bujqësi.
Ndërkohë që të tjerë sektorë që janë burime të rëndësishme punësimi vlerësohen tregtia, ndërtimi dhe industria. “Struktura e punësimit sipas aktiviteteve ekonomike tregon një përqendrim më të lartë të të punësuarve në: bujqësi me 44.7 për qind, në tregti me 11.7 për qind, në industrinë përpunuese me 7.1 për qind dhe në ndërtim me 8.4 për qind”,- theksohet në Anketën e Forcave të Punës të INSTAT-it.
Ndërsa struktura e punësimit sipas grup-profesioneve paraqet një përqendrim më të lartë të të punësuarve në grupin e madh “Punëtorë të kualifikuar të bujqësisë dhe peshkimit” me 43.5 për qind, pasuar nga grupi “Zejtarë dhe punëtorë të zanateve të ndryshme” me 10.6 për qind dhe grupi “Punëtorë të shërbimeve, shitblerjeve dhe dyqaneve”, me 9.9 për qind.