Janë plot 80 milion euro që duhet tju shpërndahen punëtorëve dhe sipas kryetarit të BSPK-së, Haxhi Arifi, janë shpërndarë vetëm 15 milion euro.
“ 20 përqindëshi nuk është shpërndarë deri tani qëllimisht nga Agjencioni Kosovar I Mirëbesimit. Ne i kemi propozuar AKM-së vitin e kaluar si të shpërndahen sa më shpejt këto para dhe ata e kanë pranuar si të drejtë propozimin,por nuk e kanë zbatuar asnjëherë”,- tha Arifi për Telegrafi.
Sipas tij në departamentin e AKM ,që është marrë me pagesat e punëtorëve prej parave që u takojnë,ka qenë I punësuar vetëm një person.
“Llogaritni për 5 mijë ankesa vetëm një person ka punuar. Kjo është bërë qëllimisht nga njerëz brenda AKM-së për interesa private”.
Deri tani AKM është menaxhuar nga ndërkombëtarët ndërsa para dy muajsh qeveria krijoi një bord transitor, i cili pritet të marrë votëbesimin gjatë ditës së sotme në Parlamentin e Kosovës.
Burime nga Agjencioni Kosovar I Privatizimit( emri që ka marrë tani),thanë për Telegrafi se prioritet i tyre do të jetë kthimi i 20 përqindëshit tek punëtorët.
“Janë disa rregullore të cilat e kanë ngatërruar më shumë problemin. Prioritet i yni tani do të jetë që tu japim punëtorëve paratë që u takojnë.Besojmë se nuk do të ketë probleme”, tha i njëjti burim.
Të ardhurat totale nga privatizimi sipas Bankës Qendrore të Kosovës të pranuara nga AKM-ja deri tani kanë arritur në 362 milionë euro, ndërsa rreth 43 milionë të tjera do të pranohen ndërkohë.
Gati 93 milionë euro është shuma e shitjeve me anë të Spin-Off Special (SOS) prej së cilës 91.9 milionë euro janë nënshkruar tashmë, ndërsa fituesit e tjerë preeliminarë janë shpallur.
Shuma akumulative për të cilën është zotuar se do të investohet është 191 milionë euro, ndërsa shuma aktuale e investimeve është përafërsisht 91 milionë euro.
Nëpërmjet procesit të privatizimit, Kosova tërheq për çdo vit që nga viti 2004 rreth 75.5 milionë euro kapital të huaj. Qarkullimi i kapitalit të huaj në procesin e privatizimit gjatë vitit 2007 ka qenë rreth 60%. /Telegrafi/