Policia në Vlorë ka finalizuar një operacion antidrogë ku është arrestuar një 20-vjeçar dhe u vunë nën hetim tre të tjerë.
I riu shiste doza të drogave të forta dhe të kanabisit, në lokalet e natës. 3 shtetasit e huaj dhe shqiptarë nën hetim, u kapën me lëndën narkotike që dyshohet se e kanë blerë nga 20-vjeçari.
Gjatë kontrollit në automjetin e 20-vjeçarit, në lagjen “1 Maji”, shërbimet e Policisë gjetën 350 doza të dyshuara të lëndëve narkotike kokainë dhe kanabis. Dozat dyshohet se do të shiteshin nga shtetasi V. R., në lokale nate, në Vlorë, bën me dije policia.
Dozat e lëndëve narkotike u sekuestruan në cilësinë e provës materiale. Materialet procedurale i kaluan Prokurorisë pranë Gjykatës së Rrethit Gjyqësor Vlorë, për veprime të mëtejshme.
Kontrollet në lokalet e natës në qark, si në zonën përreth tyre, do të vijojnë. /Telegrafi/
