Volkswagen ka ndaluar një investim të planifikuar 1.4 miliard dollarë në Turqi, si rezultat i ofensivës ushtarake të vendit në Siri.
Sipas CNN, përcjell Telegrafi, prodhuesi më i madh në botë, i cili operon 122 impiante prodhimi në të gjithë botën, ishte duke u përgatitur të merrte një vendim përfundimtar për një fabrikë të planifikuar për provincën perëndimore Manisa të Turqisë.
“Vendimi për uzinën e re u shty nga bordi i menaxhimit të Volkswagen AG”, tha kompania në një deklaratë. “Ne po vëzhgojmë situatën me kujdes dhe jemi të shqetësuar për zhvillimet e tanishme”.
Fabrika prej 1.3 miliard eurosh (1.4 miliard dollarë) thuhet se ishte planifikuar për të prodhuar Volkswagen (VLKAF) Passat dhe Skoda Superb.
Volkswagen Group tashmë ka një fabrikë në Turqi, e cila prodhon automjete komerciale për filialin e saj MAN.
Turqia nisi një operacion ushtarak javën e kaluar të territorit në Sirinë Veriore të kontrolluar nga kurdët, një pakicë etnike, aleate me Shtetet e Bashkuara që luajtën një rol të madh në luftën kundër ISIS-it.
Kancelarja gjermane Angela Merkel i ka kërkuar presidentit turk Rexhep Tajip Erdogan që të përfundojë ofensivën, duke përmendur rrezikun e pasojave të rënda humanitare dhe një ringjallje nga ISIS.
Po sipas CNN, qeveria gjermane gjithashtu është bashkuar me Francën, Norvegjinë, Finlandën dhe Holandën në urdhërimin e ndalimit të shitjeve të pajisjeve ushtarake në Turqi.
Presidenti amerikan Donald Trump, i cili është akuzuar për “pastrimin e një shtegu për pushtimin e Turqisë” duke larguar trupat amerikane jashtë veriut të Sirisë, të hënën njoftoi sanksione të reja ndaj disa ministrave turq.
Trump gjithashtu tha që Shtetet e Bashkuara do të rrisin tarifat mbi eksportet turke të çelikut në 50% dhe “menjëherë” të ndalojnë negociatat tregtare me Ankaranë. /Telegrafi/