Ditëve të fundit në vendet e Evropës por edhe rajonit janë shënuar raste të larta të të infektuarve me coronavirus.
Por, pavarësisht kësaj gjendja në Kosovë mbetet më e qetë, duke marrë parasysh se tash e disa ditë krahasuar me vendet tjera kemi numër më të vogël të rasteve të të infektuarve dhe vdekjeve brenda një dite.
Sipas IKSHPK-së, dje në vend nga 649 mostra vetëm 77 raste kanë rezultuar pozitive, ndërkaq nuk është shënuar asnjë rast i vdekjes.
Që nga fillimi i pandemisë në Kosovë e deri më sot, nga ky virus janë prekur 16 mijë e 502 qytetarë nga 77 mijë e 272 sa kanë qenë të dyshimtë në virusin SARS-CoV-2.
Fatkeqësisht jetën nga ky virus e kanë humbur 650 qytetarë.
Numri i të shëruarve ka arritur në 14 mijë e 519 raste, kurse numri i rasteve që mbeten ende aktive në vend është 1 mijë e 333.
Kujtojmë se kryeministri Avdullah Hoti ka paralajmëruar masa më ekstreme në rast se më dy javët e ardhshme do të kemi rritje të rasteve siç po ndodh në vendet e Evropës dhe rajonit. /Telegrafi/