Ministria për Evropën dhe Punët e Jashtme e Shqipërisë në bashkëpunim me Ambasadën e Republikës së Çekisë dhe Ambasadën e Republikës së Sllovakisë zhvilluan një aktivitet në kuadër të 100-vjetorit të vendosjes së marrëdhënieve diplomatike të Shqipërisë me atë që dikur quhej Çekosllovaki.
Në fjalën e saj përshëndetëse, Ministrja e Jashtme, Olta Xhaçka tha se Shqipëria është mirënjohëse ndaj Çekisë dhe Sllovakisë për rolin e tyre pro-aktiv në advokimin dhe përshpejtimin e rrugës sonë drejt BE-së.
“Shqipëria i konsideron Çekinë dhe Sllovakinë si dy “avokate të forta” të rrugëtimit tonë drejt BE-së. Zërat e tyre, si pjesë edhe të Grupit të Vishegradit, kanë qenë shumë të rëndësishme në lidhje me avancimin e Shqipërisë në agjendën e saj evropiane”, ka thënë ministrja, sipas një njoftimi për shtyp të ministrisë.
“Ndaj dhe mirëpresim vijimin e bashkëpunimit tonë të ngushtë e konstruktiv, veçanërisht gjatë Presidencës së ardhshme çeke të BE, në gjysmën e dytë të këtij viti, për të avancuar përpjekjet tona për integrim më të ngushtë e më të shpejtë të Shqipërisë me BE-në”, shtoi Xhaçka.
I pranishëm në këtë aktivitet, Ambasadori i Çekisë Karel Urban, shprehu mbështetjen e palëkundur të Republikës Çeke për proceset integruese evropiane të Shqipërisë.
“Shpresoj se Konferenca e parë Ndërqeveritare do të ndodhë në qershor. Jam i sigurt se Presidenca Çeke do të bëjë të pamundurën për të vazhduar dhe shtyrë procesin më tej, veçanërisht në dritën e ngjarjeve të trishtueshme në Ukrainë”, tha ai.
Ndërsa, Ambasadori i Sllovakisë Peter Spišiak theksoi se marrëdhëniet Shqipëri-Sllovaki bazohen në vlera dhe prioritete të përbashkëta që do t’i udhëheqin dy vendet të punojnë së bashku gjatë viteve të ardhshme.
“Bashkëpunimi ynë i ndërsjellë vazhdon edhe gjatë anëtarësimit të Shqipërisë në Këshillin e Sigurimit të OKB-së. Sllovakia ka qenë gjithmonë një promotore e fortë e zgjerimit të BE-së dhe një mbështetëse e fortë e Shqipërisë në rrugën e saj drejt BE-së”, tha ai.
Marrëdhëniet diplomatike mes Shqipërisë dhe Çekosllovakisë u vendosën në vitin 1922, kur si një anëtare e Lidhjes së Kombeve, Shqipëria kërkonte të shtonte numrin e aleatëve dhe partnerëve të saj, si për sa i takon lidhjeve diplomatike ashtu edhe atyre ekonomike.
Më 1 janar 1993, Shqipëria njohu Republikën Çeke dhe Republikën Sllovake, si dy vende të pavarura dhe vendosi marrëdhënie diplomatike me secilën prej tyre. /Telegrafi/
