Kapiteni Bastian Schweinsteiger ka dhënë dorëheqje nga kombëtarja gjermane e futbollit.
Futbollisti 31-vjeçar dha para pak minutash njoftimin e vet zyrtar nëpërmjet një postimi në rrjetin social “Twitter”, ku lajmëron tifozët se nuk do të jetë më pjesë e skuadrës së “pancerave”.
Mesfushori i ka kërkuar trajnerit Joachim Löw të mos grumbullohet më. Arsyeja kryesore e këtij vendimi të vështirë është forma fizike gjithnjë në rënie e ish-mesfushorit të Bayernit, i cili ka vuajtur tmerrësisht shumë nga dëmtimet.
Schweinsteiger ka luajtur me Gjermaninë që nga viti 2004, duke u aktivizuar në 120 ndeshje, i renditur i katërti në listën e futbollistëve gjermanë me më shumë paraqitje me kombëtaren.
Ai ka luajtur në shtatë turne dhe në Botërorin 2014 u shpall kampion bote pas një performance epike të tij në finalen me Argjentinën. Pas aventurës me triumf në Brazil, ai mori vendin e kapitenit të dorëhequr, Philipp Lahm, teksa tani lë detyrën ashtu si ish-shoku i tij i skuadrës te Bayerni. /Telegrafi/
Vielen Dank an alle für die tolle Zeit! #DieMannschaft pic.twitter.com/kNrLa7eDvE
— Basti Schweinsteiger (@BSchweinsteiger) July 29, 2016