Të mërkurën Liria ka nisur me përgatitjet për stinorin pranveror. Agron Beseni,kryetrajner dhe ndihmësi Bekim Bakaj, janë figura të reja që janë vendosur në këto detyra nga Bordi. Që të dy, krahas trajnerit të portierëve ishin në nisje të këtij cikli.
Të pranishëm nga Bordi ishin: Mirsad Çollaku, kryetar, n/kryetari Qemal Krasniqi dhe anëtarët e Bordit, Erxhan Dana e Mitat Muhameti.
“Kemi filluar këtu në ‘P.Thaçi’, kushtet janë të mira për këtë fazë.Ndërsa, më pas do të udhëtojmë jashtë vendit, diku në bregdet, ku edhe do të kemi një sërë ndeshjes kontrolluese’, ka thënë kryetari Mirsad Çollaku, ku ka theksuar se njërën nga fazat Liria pritet ta zhvillojë në bregdet.
Thirrjes së parë i janë përgjigjur të gjithë futbollistët, pos Gentian Elezajt, që pritet t’i bashkohet skuadrës (ndodhet jashtë vendit), si dhe Henry Chibueze e Deji Joel, që me leje ndodhen në pushim.
Që nga dita e parë skuadrës i është bashkuar transferi i parë, Fillim Guraziu që pritet të forcojë sulmin ‘bardhezi’.
Ndryshe, sa i takon prurjeve, Liria ka kohë që po negocion me disa emra, e me të cilët pritet konkretizimi këto ditë. ‘Shpresoj, që me përkushtim , disiplinë dhe përkrahjen e të gjithëve të arrijmë suksese bashkarish. Ne, si shtab tenikk do të japim maksimumin për të mirën e klubit’, ka thënë Agron Beseni.
