Një zjarr i madh, i shkaktuar nga rrufeja, ka përfshirë një shtëpi në fshatin Celinë të komunës së Rahovecit.
Ngjarja ka ndodhur pas një seri rrufesh të fuqishme që kanë goditur rrafshin e Dukagjinit mbrëmjen e së hënës.
Lexuesit kanë dërguar pamje të zjarrit nga vendi i ngjarjes, ku mund të shihet qartë se flakët kanë kapluar shtëpinë, duke e dëmtuar rëndë.
Sipas informacioneve paraprake, zjarrfikësit kanë arritur në vendngjarje dhe po punojnë për shuarjen e zjarrit.
Megjithatë, dëmet materiale janë të konsiderueshme dhe shtëpia ka pësuar dëmtime të mëdha. Fatmirësisht, deri tani nuk janë raportuar të lënduar apo viktima nga ky incident.
Autoritetet lokale janë duke monitoruar situatën dhe po bëjnë thirrje për kujdes gjatë stuhive me rrufe. Ata rekomandojnë që banorët të shmangin qëndrimin jashtë dhe të sigurojnë shtëpitë e tyre sa më mirë që të jetë e mundur.
Media lokale “Rahoveci n’fokus” ka shpërndarë disa foto nga vendi i ngjarjes./Telegrafi/
