Gjatë mbrëmjes së sotme, janë ndezur zjarre në fshatrat Brusnik dhe Ceceli të Vushtrrisë.
Ekipet e zjarrfikësve dhe të Policisë tashmë janë dalur në terren dhe po punojnë drejt shuarjes së këtyre zjarreve, shkruan Telegrafi.
Kryetari i Komunës së Vushtrrisë, Ferit Idrizi, ka bërë të ditur se kanë dalur në terren dhe po e monitorojnë nga afër situatën e zjarreve.
Idrizi u ka bërë thirrje qytetarëve të evitojnë çdo veprim që mund të shkaktojë zjarr.
“Në këtë kohë të ndjeshme, ju bëjmë thirrje të tregoni kujdes maksimal dhe të evitoni çdo veprim që mund të shkaktojë zjarr, si ndezja e zjarreve në natyrë apo djegia e mbeturinave. Çdo rast urgjent mund ta raportoni menjëherë tek autoritetet për të shmangur përhapjen e mëtejshme të zjarreve”, ka thënë ai.
Kryetari i kësaj komune është shprehur se së bashku mund të mbrojnë komunitetin dhe mjedisin, derisa ka falënderuar zjarrëfikësit dhe Policinë për punën dhe përkushtimin e tyre. /Telegrafi/
