Manchester United mund të ‘zhytet’ në një krizë më të thellë financiare në rast se ata vendosin që të shkarkojnë trajnerin Erik ten Hag gjatë verës.
Tekniku holandez po mbahet në ‘fije të perit’ në ‘Old Trafford’ pasi sezoni i tij i dytë në klub nuk është duke shkuar aspak siç ishte parashikuar fillimisht.
United përfundoi në pozitën e fundit në grup në Ligën e Kampionëve dhe u eliminuan nga Carabao Cup nga Newcastle. Momentalisht, ata renditen në pozitën e gjashtë në Ligën Premier dhe gjasat për kualifikim në Ligën e Kampionëve sezonin e ardhshëm janë minimale.
‘Djajtë e Kuq’ e patën të pamundur që të nënshkruajnë me një sulmues gjatë janarit për shkak të shqetësimeve për thyerjen e rregullave financiare.
Sidoqoftë, në rast se ata vendosin që të shkarkojnë Ten Hag, bordi i klubit duhet të paguajë hiq më pak se 10 milionë euro si kompensim.
Në rast se Ten Hag shkarkohet para datës 30 qershor, ajo shumë do të hynte si pjesë e shpenzimeve për seonin 2023/2024, me ç’rast United do t’i afrohej thyerjes së Rregullave të Profitit dhe Qëndrueshmërisë.
Nëse ky skenar ndodh, atëherë ata do të detyroheshin që të shitnin disa lojtarë për të vënë një balancë tek të ardhurat./Telegrafi/