Ylli i Manchester United, Marcus Rashford, ka shkaktuar zemërim në mesin e tifozëve të Manchester United, pasi ka përfunduar në një klub nate pas disfatës së rëndë në derbin e qytetit ndaj Manchester Cityt, ku pësuan me shifrat 3-0.
Pak orë pas debaklit që pësuan Djajtë e Kuq, Rashford është fotografuar në një nga klubet e natës, ku po festonte 26-vjetorin e lindjes.
Festa në pjesën private të lokalit të natës ka zgjatur deri në orët e para të mëngjesit dhe të pranishmit, mes tyre edhe shoku i skuadrës Tyrell Malacia, e kanë përfunduar në orën 3:30.
Tifozët e United tashmë kanë hedhur zjarr mbi yllin e klubit të tyre, me shumë që presin që Rashford të pezullohet, ashtu si bashkëlojtari i tij Jadon Sancho i cili së fundmi u grind me trajnerin Erik ten Hag.
Është trajneri holandez ai që do të shqyrtojë masat e mundshme disiplinore ndaj futbollistëve.
Kujtojmë se të dielën United u mposht bindshëm 3-0 nga City me protagonist kryesor Erling Haaland që shënoi dy gola dhe Phil Foden me një tjetër.
Rashford luajti 86 minuta në këtë ndeshje pa lënë ndonjë gjurmë dhe pasi festoi në klubin e natës, u shfaq në seancën stërvitore të mëngjesit në kampin e klubit në Carrington./Telegrafi/