Trajneri i Përfaqësueses së Kosovës, Muharrem Sahiti, dhe gazetari i SuperSport Kosova, Florim Canolli, kanë diskutuar në emisionin Fan Zone të Supersportit, dhe njëherit u janë përgjigjur gazetarëve nga Shqipëria për të ardhmen e Përfaqësueses së Kosovës pas pranimit në UEFA e FIFA.
Tema kishte të bënte nëse lojtarët me prejardhje nga Kosovës, sidomos ata të Zvicrës dhe Adnan Januzaj, do të vijnë të luajnë për vendlindjen e tyre.
Canolli përdori fjalën ‘Vendlindja thërret’, duke theksuar se atyre duhet bërë ftesa menjëherë pas pranimit.
“Mendoj se të gjithë futbollistët që luajnë për shtetet evropiane, përjashto Shqipërinë, duhet të ftohen që të luajnë për Kosovën. Është obligim moral i Federatës së Futbollit të Kosovës dhe përzgjedhësit Bunjaku ta bëjë një gjë të tillë, në mënyrë që t’iu jep mundësinë atyre të luajnë për vendlindjen e tyre, siç kanë bërë prindërit e tyre në një kohë tjetër, mjafton të kujtojmë atë fjalinë e famshme “Vendlindja Thërret”, dhe të gjithë e dinë për çfarë po flasim. Tani është një kohë tjetër, por Vendlindja prapë thërret që ata të kontribuojnë, këtë herë në lojën e futbollit”, tha Canolli, duke shtuar se të gjithë e kanë për obligim që të promovojnë Kosovën në mënyrë që historia të mos na gjykoj.
“Është moment historik për të gjithë, qoftë edhe për neve si gazetar. Kosova duhet të ftojë për shembull Xherdan Shaqirin në mënyrë që fëmija i tij të kur ta pyes në të ardhmen pse babi nuk ke luajtur për Kosovën, të mos thotë ai sepse Kosova nuk më ftoi. Jo, Kosova duhet t’i ftojë të gjithë në mënyrë që historia të mos na gjykoj”, shtoi ai.
Kosova pritet të pranohet në UEFA më 3 maj, në Kongresin që do të mbahet në Budapest.