Si pasojë e kushteve ekstreme të motit që shkaktuan valë të forta të nxehtit, rrëshqitje dheu dhe përmbytje, të paktën 11 persona humbën jetën në Indi këtë javë, njoftuan autoritetet lokale.
Kryeqyteti New Delhi mbrëmë regjistroi natën më të nxehtë në gjashtë vjet ndërsa spitalet raportuan të paktën pesë të vdekur nga goditja e nxehtësisë, shkruan Times of India.
Autoritetet thanë se të paktën gjashtë persona u vranë dje në përmbytjet dhe rrëshqitjet e dheut të shkaktuara nga shirat e pandërprerë në shtetin verilindor të Assam.
“Një grua dhe tre vajzat e saj u varrosën të gjallë”, tha zyrtari shtetëror i menaxhimit të fatkeqësive, Siu Das, duke shtuar se një fëmijë tre vjeçar u vra gjithashtu.
Në të gjithë Azinë këtë verë janë regjistruar temperatura jashtëzakonisht të larta dhe shkencëtarët thonë se shkaku janë ndryshimet klimatike të shkaktuara nga njerëzit dhe se situata do të përkeqësohet, raporton reuters.
Temperaturat u rritën në mbi 50 gradë Celsius në Delhi dhe në shtetin e shkretëtirës së afërt të Rajasthan, ndërsa veriperëndimi dhe lindja e vendit panë dy herë më shumë ditë të nxehta se zakonisht vetëm këtë sezon.
Në Assam, më shumë se 160 mijë njerëz janë prekur nga përmbytjet, me ujë që ka arritur nivele alarmante në Kopila, një nga degët kryesore të Brahmaputrës. Më shumë se 30 njerëz në shtetin e Assam kanë vdekur që nga fundi i majit nga përmbytjet dhe rrëshqitjet e dheut, thanë zyrtarët. /Telegrafi/