Louis van Gaal ka thënë se është më e vështirë për të që të blejë lojtarë kualitativë për Manchester Unitedin sesa Claudio Ranieri për Leicester Cityn.
Trajneri holandez ka kaluar nëpër dy sezone të vështira dhe deri më tani ka ndryshuar shpesh formacionin. Derisa ka folur për transferime, LVG ka thënë se qasja e klubeve kur Unitedi interesohet për një lojtar të tyre është shumë më ndryshe sesa interesimi i një klubi siç është Leicesteri.
Ai në vitin 2009 fitoi ligën holandeze me AZ Alkmaarin dhe ka thënë se atje e kishte më të lehtë transferimin e lojtarëve sesa te Unitedi, klub në të cilin gjatë dy sezoneve ka shpenzuar rreth 100 milionë funte.
“Klubet si AZ ose klubet më të vogla siç është Leicesteri, është më e lehtë të blejnë lojtarë. Nuk është e lehtë kjo për një klub si Manchester Unitedi”, ka thënë Van Gaal.
“Duhet të paguani më shumë, duhet të paguani agjentët dhe pastaj keni lojtarët. Presioni i transferimit të lojtarit është më i vogël. Prandaj është dallim i madh”.