Në muajin shtator, forcat speciale të ushtrisë izraelite ndërmorën një operacion në një lokacion të nëndheshëm në Siri, i cili pretendohej të ishte përdorur për prodhimin e qindra raketave precize që do të shfrytëzoheshin nga Hezbollahu për sulme ndaj Izraelit.
Kompleksi, i vendosur pranë Masjafit, afër bregdetit të Mesdheut, është përshkruar nga nënkoloneli Nadav Shoshani si “perla e përpjekjeve iraniane për prodhim në rajonin tonë”. Ai sqaroi se ky objekt ishte projektuar për të prodhuar qindra raketa strategjike çdo vit, të cilat do të përdoreshin nga Hezbollahu për sulme ajrore kundër Izraelit.
Sipas Shoshanit, ky vend, i ndërtuar në brendësi të një mali, ishte monitoruar nga Izraeli që nga fillimi i ndërtimit të tij në vitin 2017. Tani, kompleksi ishte në gjendje të prodhonte raketa me precizion të lartë, disa prej të cilave kishin një rreze veprimi deri në 300 kilometra.
DECLASSIFIED: In September 2024, before the fall of the Assad Regime, our soldiers conducted an undercover operation to dismantle an Iranian-funded underground precision missile production site in Syria.
Watch exclusive footage from this historic moment. pic.twitter.com/s0bTDNwx77
— Israel Defense Forces (@IDF) January 2, 2025
“Kjo aftësi ishte bërë funksionale, prandaj flasim për një kërcënim të menjëhershëm”, tha Shoshani.
Detajet e operacionit të datës 8 shtator janë raportuar në mediat izraelite, por kjo ishte hera e parë që ushtria e konfirmoi publikisht, një veprim i rrallë për operacionet e forcave speciale.
Kryeministri izraelit, Benjamin Netanyahu e përshëndeti këtë aksion, duke e quajtur “një nga operacionet parandaluese më të rëndësishme kundër përpjekjeve të boshtit iranian për të prodhuar armatim për sulme ndaj nesh”. Ai shtoi se ishte një nga operacionet më komplekse të realizuara nga Forcat e Mbrojtjes së Izraelit (IDF) vitet e fundit.
Në përfundim të misionit, ushtria çmontoi të gjithë objektin, përfshirë makineritë dhe pajisjet e prodhimit. /Telegrafi/