Manchester Unitedi ka fituar me rezultat minimal 1-0 në udhëtimin e tyre te Leicester City në ndeshjen e vlefshme për javën e 25-të në Ligën Premier.
Djajtë e Kuq kanë vazhduar serinë pozitive nën drejtimin e Ole Gunnar Solskjaer, duke iu rikthyer fitores pas barazimit ndaj Burnley.
Pjesa e parë e ndeshjes i takoi Djajve të Kuq, të cilët përveç rasteve të krijuara arritën të tundin edhe rrjetën.
Goli i vetëm në këtë pjesë erdhi në minutën e nëntë dhe ishte Marcus Rashford, i cili shënoi për 0-1 pas asistimit të Paul Pogbas.
Në pjesën e dytë, vendasit e Leicesterit ishin më kërkues dhe më të mira duke krijuar më shumë raste për gol.
Rasti më i mirë i kësaj pjese ishte ai i minutës së 61-të, por goditja me gjysmë vole e Jamie Vardyt u prit nga portieri David De Gea.
Deri në fund të ndeshjes, vendasit provuan edhe disa herë dhe patën raste të mira shënimi, por pa pasur sukses dhe ndeshja përfundoi me fitoren 1-0 të Unitedit.
Pas kësaj fitore, Djajtë ngjiten në vendin e pestë me 48 pikë, ndërsa Dhelprat zënë vendin e 11-të me 32 pikë.
Në ndeshjen e radhës, Unitedi udhëton te Fulhami, ndërsa Leicesteri luan në udhëtim te Tottenhami. /Telegrafi/
