UEFA ka konfirmuar që Stadio Olimpico i Romës do të jetë një nga vendet që në këtë verë do të zhvillohen lojërat e kampionatit të shtyrë ‘Euro 2020’ me praninë e spektatorëve.
Të martën, qeveria italiane dha sqarimin e plotë për stadiumin kryeqytetas që është i gatshëm për të pritur të paktën 25 për qind të kapacitetit të tifozëve në Euro 2020.
UEFA tani e ka konfirmuar Romën si njërin nga vendet mikpritëse të Kampionatit Evropian, përcjell KP.
“UEFA ka marrë sot nga Shoqata Italiane e Futbollit konfirmimin nga Qeveria Italiane se ndeshjet e ‘UEFA Euro 2020’ të planifikuara për në stadiumin Olimpico në Romë, do të zhvillohen me spektatorë”.
“Autoritetet kanë garantuar që të paktën 25 për qind e kapacitetit të stadiumit do të plotësohet. Si rezultat, UEFA konsideron që Roma të konfirmohet plotësisht si një vend për këtë turne”, thuhet në njoftim.
Italia do të luajë ndeshjen e parë të turneut kundër Turqisë pikërisht në Stadio Olimpico më 11 qershor.