Federata e futbollit e Kosovës, ka marr një mbështetje të madhe nga UEFA në vlerë prej 630 mijë eurove, për t’i ndihmuar klubet kosovare.
50 për qind e kësaj shume, i është ndarë të gjitha klubeve që veprojnë nën ombrellën e FFK-së, ndërkaq pjesën tjetër do ta marrin shumë shpejt.
Kjo ndihmë e madhe që ka ardhur nga UEFA për klube, ka të bëjë me rregullimin e infrastrukturës, e në veçanti, vendit për gazetarë e kameramanë.
Por, edhe përkundër kësaj, gjendja vazhdon të mbetet e njëjtë në shumicën e stadiumeve kosovare.
Ndarjen e gjysmës së mjeteve financiare të UEFA-s për të gjitha klubet, e ka konfirmuar për KTV, sekretari i FFK-së, Eroll Salihu.
Përveç kësaj ndihme, FFK-ja është shumë afër që të marrë një projekt tjetër të rëndësishëm nga shtëpia e futbollit evropian, ku të gjithë futbollistët në Kosovë që nga mosha 10 vjeçare do të regjistrohen dhe do ta kenë numrin e tyre identifikues.
Aktualisht në Superligën e Kosovës, përveç disa klubeve që sadopak kanë krijuar kushte minimale për media, klubet e tjera, edhe pse i kanë marr një pjesë të mjeteve, nuk e kanë bërë asnjë hap që ta rregullojnë vendin për media dhe në shumë raste një ndeshje futbolli, gazetarët e shikojnë edhe në këmbë.