ESL ka hapur regjistrimin për kualifikimet e hapura për IEM Dallas, ngjarja e parë e madhe LAN e organizatorit të turneut në Amerikën e Veriut që nga turneu ESL One New York në vitin 2019.
Turneu i cili pritet të zhvillohet nga data 3 deri 5 qershor, do të shpërndajë çmime rreth 226 mijë euro, ku do të marrin pjesë 16 skuadra, gjashtë nga të cilat do të fitojnë vendin e tyre përmes kualifikimeve të mbyllura në katër rajone.
Rrugëtimi drejt turneut kryesor do të fillojë me kualifikimet e hapura për Amerikën e Veriut, Amerikën e Jugut, Evropën dhe Australinë e Zelandën e Re, ku i gjithë procesi do të nisë më 11 prill dhe do të përfundojë në ditën e fundit të kualifikimeve të mbyllura më 4 maj.
Dy skuadrat e para nga secili prej kualifikimeve të hapura në Evropë dhe Amerikën e Veriut do të kalojnë në fazën e mbyllur, ndërsa në Amerikën e Jugut dhe Australi e Zelandën e Re, vetëm një ekip nga çdo kualifikues do të kalojë.
Ekipet të cilat sigurojnë vendin për në kualifikueset e mbyllura, do të përballen me një numër skuadrash të ftuara, për një vend në ngjarjen kryesore. /Telegrafi/