Shumë njerëz mendojnë se e kanë kuptuar plotësisht se si i shohin të tjerët
Ndoshta mendon se je një komunikues i shkëlqyer, një punonjës i zoti me shifra, ose një menaxher që gjithmonë nxjerr më të mirën nga ekipi. Por e vërteta shpesh mund të jetë shumë ndryshe.
Në fakt, shpesh mund ta kemi tërësisht të gabuar mënyrën se si të tjerët na perceptojnë.
Imagjino një menaxher modest që kishte bindjen se i trajtonte kolegët e tij me respekt dhe ndjeshmëri, por pasi punoi me një trajner ekzekutiv, ai mësoi një të vërtetë të hidhur: Zakoni i tij për t’i ndërprerë të tjerët i kishte bërë kolegët ta shihnin si arrogant dhe mendjemadh. A ishte ky qëllimi i tij?
Absolutisht jo. Por ky ishte perceptimi i të tjerëve…
Ku fillon problemi?
1. Zakonet që ne nuk i vëmë re te vetja – Njësoj si rasti i mësipërm, shumë prej nesh mund të kemi zakone që as nuk i vëmë re, por që lënë përshtypje të gabuara tek të tjerët. Të ndërpresësh dikë mund të duket si një gjest i pafajshëm kur je në mes të një diskutimi, por për të tjerët mund të interpretohet si mungesë respekti apo arrogancë.
2. Vetëbesimi i rremë – Të gjithë kemi një version të vetes që mendojmë se reflektojmë tek të tjerët. Problemi është se ky version shpesh është i ndikuar nga vetëbesimi ynë apo nga dëshira jonë për t’u parë në një mënyrë të caktuar. Kjo na çon drejt një iluzioni se kuptohemi dhe vlerësohemi ashtu siç dëshirojmë.
3. Mungesa e reagimeve të sinqerta – Shumë herë të tjerët hezitojnë të japin komente të sinqerta. Ndonjëherë për shkak të frikës nga konflikti ose nga dëshira për të mos të të lënduar. Kjo mungesë transparence na lë të mendojmë se çdo gjë është në rregull, edhe kur nuk është.
Çfarë mund të bësh për ta kuptuar se si të shohin të tjerët?
· Kërko reagime të sinqerta – Të marrësh komente të vërteta nga ata që punojnë me ty është thelbësore. Jo gjithmonë është e lehtë të dëgjosh kritika, por ky është hapi i parë për t’u përmirësuar. Kërko komente të qarta dhe specifike, jo vetëm fjalë të përgjithshme.
· Vëzhgo veten – Merr kohë për të reflektuar mbi sjelljet e tua të përditshme. A ke ndonjë zakon që mund të keqinterpretohet? A je i ndërgjegjshëm për mënyrën se si komunikon me të tjerët? Sa më shumë të përpiqesh të kuptosh veten, aq më e lehtë do të jetë të kuptosh si të tjerët të shohin.
· Mëso të marrësh kritika – Kritika nuk duhet parë si një sulm personal. Kur dikush të jep një koment negativ, përpiqu ta marrësh si mundësi për të mësuar dhe për t’u përmirësuar, në vend që të mbrohesh apo të ndihesh i/e sulmuar.
Perceptimi është çelësi
Në fund të ditës, mënyra se si të shohin të tjerët mund të ndikojë në marrëdhëniet që krijon, si profesionale ashtu edhe personale. Edhe pse është e rëndësishme të mbetesh vetvetja, është po aq e rëndësishme të sigurohesh që vetja jote të perceptohet saktë nga ata përreth teje. Ndonjëherë, është më mirë të ndalosh dhe të shohësh veten nga perspektiva e të tjerëve për të kuptuar se si realisht të shohin. Mos u bazo vetëm në mendimet e tua, mëso nga ata që të rrethojnë. /Telegrafi/