Manchester United ka marrë një fitore të madhe në udhëtim te Bournemouth me rezultat minimal 0-1.
Kjo fitore i afron edhe më shumë Djajtë e Kuq me një pozitë që i dërgon sezonin e ardhshëm në Ligën e Kampionëve.
Heroi i United në këtë sfidë ka qenë mesfushori brazilian Casemiro që realizoi një gol spektakolar në këtë sfidë shumë të rëndësishme.
E lëvdatat për brazilianin nuk i ka kursyer edhe trajneri i Djajve të Kuq, holandezi Erik Ten Hag.
“Casemiro shënoi një gol brilant, vazhdon të na befasoj çdo ditë. Është një futbollist fantastik, në fakt e dinim që në fillim se ai është nga më të mirët kur vjen puna te organizimi, pozicionimi, interceptimet, duelet e fituara, lufta në fushë si dhe energjia që transmeton për shokët e skuadrës”.
“I shkëlqyer. Padyshim që ka përmbushur të gjitha pritshmëritë që kishim në fillimin e sezonit, nuk ka shumë lojtarë në atë pozicion që i përshtaten United dhe ne jemi të lumtur që kemi në skuadër Casemiron”.
“Kontributi i Casemiros në ekip këtë edicion është i jashtëzakonshëm”, deklaroi trajneri holandez. /Telegrafi/