Talibanët ua kanë ndalur femrave përdorimin e palestrave të fitnesit dhe shkuarjet në parqe.
Ky është kufizimi më i fundit që po i bëhet femrave në Afganistan, pasi këtë vend e morën nën kontroll talibanët, transmeton Telegrafi.
Edhe pse në fillim tentonin të bindnin botën se regjimi i tyre nuk nënkupton domosdoshmërisht kufizimin e të drejtave të grave, ata pas ardhjes në pushtet ua ndaluan vajzave ndjekjen e mësimit në shkolla fillore dhe ato të mesme, si dhe ua pamundësuan të punësohen dhe obliguan të bartin mbulesa kur janë në rrugë.
Zëdhënësi i ministrisë së Virtyteve, ka thënë se ndalesa po bëhet pasi që njerëzit po injoronin urdhrat e ndarjes gjinorë, dhe gratë femrat nuk mbanin mbulesë kur ishin në palestër. Atyre gjithashtu u është ndaluar hyrja nëpër parqe.
Mohammed Akef Mohajer, zëdhënës i ministrisë së lartcekur, ka thënë se autoritetet në 15 muajt e fundit “kanë dhënë gjithçka nga vetja”, për të shmangur këtë ndalesë për femrat në parqe dhe palestra fitnesi.
Ata më herët kishin lejuar femrat që të shkojnë në palestër, por në ditë të caktuara. /Telegrafi/