Barazimi me Italinë është hedhur pas krahëve nga Spanja që tashmë është foksusuar maksimalisht te përballja kundër Shqipërisë të dielën në “Loro Boriçi”.
Në prononcimin e tyre për faqen zyrtare të Federatës spanjolle, mbrojtësi Nacho dhe sulmuesi Vitolo flasin për pritshmëritë që kanë nga sfida e Shkodrës.
Lojtari madrilen paralajmëron shokët e skuadrës, duke theksuar se Shqipëria nuk ka emra të mëdhenj si Italia, por do të jetë një kundërshtar shumë i vështirë.
“Ata kanë një stil loje të rrezikshëm dhe mendoj se janë një skuadër e rrezikshme edhe pse nuk kanë në përbërje emra të mëdhenj. Gjithsesi ne do të kërkojmë me çdo kusht fitoren”, shprehet Nacho.
Në të njëjtën linjë qëndron edhe sulmuesi i Sevillas, Vitolo.
“E dimë shumë mirë se Shqipëria, ndryshe nga Italia nuk është një skuadër shumë e njohur por duhet të jemi shumë të kujdesshëm sepse do të na i vështirësojë shumë punën. Është një kundërshtar i vështirë dhe ne duhet të jemi edhe më të motivuar se në ndeshjen me Italinë”, ka thënë Vitolo.