Në përballjet sportive Shqipëri-Serbi ka gjithmonë tension dhe kjo situatë ndihet edhe te Skënderbeu.
Në vigjiljen e sfidës së Ligës Evropës ndaj Partizanit të Beogradit, korçarët kanë kërkuar të zhvendosin fokusin te loja në fushë.
“Ka një lloj tensioni të jashtëm, por ne kemi gjithë javën që e përgatitim ekipin për ta shmangur këtë dhe për t’u përqendruar te loja. Mbështetjen e publikut duhet ta shpërblejmë vetëm në fushën e lojës, duke fituar takimin, pa menduar për gjëra të tjera që nuk kanë lidhje me sportin”, tha Daja.
Fitorja ndaj serbëve në grupin B e ndihmon Skënderbeun të ndryshojë hierarkitë e pse jo, të pretendojë dhe vendin e dytë që vlen kualifikimin.
“Natyrisht që situata në grup na jep mundësinë të pretendojmë kalimin më tej dhe ne do të bëjmë maksimumin për t’u renditur të dytët”.
“Marrja e tre pikëve është një hap i rëndësishëm në rrugën drejt kualifikimit, kjo edhe për faktin se Young Boys do të luajë ndaj skuadrës më të fortë të grupit dhe mund të dalë pa pikë”, tha tekniku i Skënderbeut.
Trajneri Daja do të detyrohet të rimendojë zgjedhjet në formacion për shkak të dëmtimeve, ndërsa është rikuperuar Tefik Osmani që me gjasë, do ta nisë nga pankina.