Albian Ajeti është bërë hero i skuadrës zvicerane St Gallen që falë golave të tij i ka ikur fundit të tabelës në Zvicër.
Ditën e djeshme, Ajeti shënoi dy gola të bukur në fitoren 2-1 të St Gallenit ndaj Sionit, edhe pse në pjesën e parë ishin duke humbur 0-1.
Me dy golat e të dielës, Ajeti është ngritur në kuotën e pesë golave në kampionat dhe ka shënuar edhe një gol në Kupë, derisa ka bërë edhe dy asistime.
Në një prononcim për Telegrafin, sulmuesi kosovar flet për formën e tij të deritashme dhe rezultatet e arritura.
“Ka qenë një ndeshje e vështirë ndaj Sionit pasi ishim duke humbur, mirëpo shkoi gjithçka mirë në pjesën e dytë ku shënova edhe dy golat e fitores”, u shpreh Ajeti për Telegrafin.
“Deri më tani ka ecur shumë mirë pasi kam shënuar gola. Kam pasur nevojë për të luajtur ndeshje pasi golat asnjëherë nuk kanë qenë problem për mua. Shpresoj të vazhdoi me këtë ritëm”, vazhdoi tutje Ajeti.
19-vjeçari ka edhe një synim se sa gola synon të shënoi deri në fund të kampionatit.
“Nëse qëndroi këtu deri në fund të stinorit atëherë besoj se do të shënoi më shumë se 10 gola, por ende nuk e di të ardhmen time”, u shpreh kosovari.
Ai tregoi për Telegrafin se gjatë javës së ardhshme do të ketë një takim me skuadrën gjermane Augsburg për ta definuar të ardhmen pasi është i huazuar në St Gallen.
“Javën e ardhshme së bashku me menaxherët do të kemi një takim me Augsburgun. Ekziston mundësia të kthehem në Bundesliga pasi sulmuesit aktual të Augsburgut janë të lënduar”.
“Mbetet të shihet se çfarë do të ndodh nëse do të mbetem deri në fund të stinorit në Zvicër apo do të kthehem në Bundesliga. Për zhvillimin tim, më mirë është qëndrimi në Zvicër”, vazhdoi tutje Ajeti.
Ish-anëtari i Baselit llogaritët si njëri nga sulmuesit më të rrezikshëm në Zvicër.
Kujtojmë që Albiani është vëllai i vogël i mbrojtësit të Kombëtares shqiptare Arlind Ajeti, ndërsa tjetëri vëlla, Adonisi aktualisht luan tek skuadra zvicerane Wil./Telegrafi/
