Site icon Telegrafi

Shërbimi i mamografisë në Gjilan zbulon raste të kancerit të gjirit te gratë dhe meshkujt

Nga 1 korriku i vitit 2023, kur në Qendrën Kryesore të Mjekësisë Familjare (QKMF) në Gjilan u aktivizua shërbimi i mamografisë, deri më 30 shtator të këtij viti janë kryer gjithsej 1,443 ekzaminime mamografike.

Këtë e ka konfirmuar për Telegrafin, specialistja e QKMF-së në Gjilan, Ramize Ahmeti-Ibrahimi, e cila ka theksuar se kanceri i gjirit në disa raste e prek edhe gjininë mashkullore.

Sipas saj, nga 1,443 ekzaminime 83 raste kanë rezultuar pozitive me kancer të gjirit. Gjithashtu kanë rezultuar pozitive dy raste nga shtatë mamografi të realizuara te meshkujt.

Ahmeti-Ibrahimi thekson se në QKMF, procesi i ekzaminimeve për kancerin e gjirit zhvillohet çdo ditë dhe bazohet në indikacione të qarta mjekësore.

“Të gjitha gratë dhe vajzat që kanë indikacione absolute shëndetësore mund të vijnë dhe të realizojnë mamografinë”, tha ajo, derisa shpjegon se ekzaminimi kalon përmes disa fazave.

“E para është ekzaminimi i gjirit, mandej ekzaminimi klinik i gjirit te mjeku familjar, dhe nëse ai e sheh të arsyeshme, propozon për të bërë ultrazërin e gjirit. Pas kësaj, nëse ka indikacione të qarta, bëhet edhe mamografia”, ka theksuar Ahmeti-Ibrahimi.

Kryesisht, sipas specialistes Ahmeti-Ibrahimi, këto ekzaminime realizohen te gratë mbi moshën 40 vjeçare, me përjashtim të rasteve që kanë indikacione të qarta mjekësore ose anamnezë pozitive familjare.

Ajo thekson se edukimi dhe promovimi shëndetësor gjatë muajit “rozë” ka pasur një impakt të madh në ndërgjegjësimin e grave dhe vajzave sa i përket kësaj sëmundje.

“Në veçanti, tetori, i njohur si muaji rozë, ka pasur një impakt të madh në ndërgjegjësimin e grave dhe vajzave për rëndësinë e diagnostikimit të hershëm të kancerit të gjirit. Përmes fushatave sensibilizuese që zhvillohen në kuadër të QKMF-së, një numër i madh i grave ka marrë informata bazike për prevenimin e kësaj sëmundjeje”, ka thënë Ahmeti-Ibrahimi.

“Edukimi dhe promovimi shëndetësor kanë bërë një bujë të madhe”, thekson ajo, duke vënë në pah rëndësinë e informimit të drejtë për trajtimin dhe zbulimin e hershëm të kancerit të gjirit.

Ndër të tjera, Ahmeti-Ibrahimi thekson se përpjekjet e vazhdueshme për sensibilizim publik kanë rezultuar në zbulimin e rasteve me kancer të gjirit.

“Aktivizimi i mamografisë në QKMF dhe përpjekjet e vazhdueshme për sensibilizimin publik kanë rezultuar në zbulimin e rasteve të diagnostikuara dhe të ndërgjegjësimit shoqëror për këtë sëmundje, duke sjellë një ndikim pozitiv në parandalimin dhe trajtimin e saj”, ka përfunduar ajo./Telegrafi/

Exit mobile version