Një senator brazilian dyshohet se u kap me një shumë të madhe parash të fshehura në të brendshmet e tij, gjatë një bastisjeje nga Policia Federale të mërkurën.
Sipas CNN, përcjell Telegrafi, bastisja erdhi si pjesë e një hetimi të gjerë për shkak të keqpërdorimit të mundshëm të fondeve gjatë menaxhimit të situatës pandemike.
Senatori, Chico Rodrigues, i cili përfaqëson rajonin e Roraima në Senatin Federal, konfirmoi se bastisja ndodhi në shtëpinë e tij në Boa Vista. Ndërkohë, ai e ka mohuar të ketë kryer ndonjë shkelje.
Sipas një njoftimi të Gjykatës së Lartë duke cituar hetimin e policisë, thuhet se Rodrigues u gjet me rreth 5,800 dollarë të fshehura në pantallonat e tij të shkurtra gjatë kontrollit të shtëpisë së këtij të fundit nga policia.
Pamjet të cilat u xhiruan në momentin e bastisjes nuk u autorizuan nga gjykata për publikim.
“Unë do ta vërtetoj që jam i pafajshëm dhe nuk kam bërë ndonjë shkelje”, u shpreh Rodrigues. /Telegrafi/