Qindra shqiptarë nga Lugina e Preshevës në jug të Serbisë kanë marshuar të hënën, për siç thanë ata, kundër diskriminimit dhe në kërkim të barazisë dhe të drejtave të shqiptarëve në Serbi.
Nënkryetari i Këshillit Kombëtar në Luginë, Enkel Rexhepi, ka thënë në TV Dukagjini, se pasi nuk ka zgjidhje për të drejtat elementare në mënyrë tjetër, ata po detyrohen që të marshojnë, në kërkim të së drejtave.
“Jemi munduar t’i zgjidhim në mënyrë politike, preokupimet e shqiptarëve e duke mos u zgjidhur kjo çështje, ne po detyrohemi të dalim rrugëve t’i kërkojmë të drejtat elementare që na takojnë e që janë të drejta jetësore në Luginë të Preshevës”, ka thënë Rexhepi.
Teksa thotë se shqiptarët e Preshevës treguan zërin e tyre, e marshin e ditës së sotme e quan “marsh madhështor”.
“U treguan në bazë diskriminimet tërësore që janë duke ndodhur nga shteti serb”, ka deklaruar ai.