Reshjet e mbrëshme të breshërit dhe shiut në Mitrovicë kanë shkaktuar ndërprerje të energjisë elektrike dhe ngritje të nivelit të turbiditetit të ujit të papërpunuar.
Kompania rajonale e Ujësjellësit “Mitrovica” ka njoftuar se si pasojë e kësaj të fundit ka pasur ndërprerje të operimit të Impiantit për Trajtimin e Ujit në Shipol, shkruan Telegrafi.
“Operimi i impiantit është rikthyer dhe trajtimi i ujit po bëhet me kujdes dhe kapacitet të zvogëluar me qëllim të ruajtjes së cilësisë së ujit të pijes”, thuhet në njoftim.
Operatorët kujdestar në ITU-Shipol janë duke monitoruar parametrat e turbiditetit dhe në bazë të rënies së tyre do të rritet edhe kapaciteti i përpunimit dhe prodhimit.
KRU “Mitrovica” është shprehur optimist se së shpejti do të normalizohet furnizimi me ujë të pijes për Mitrovicë dhe Skenderaj. /Telegrafi/
