Të tjerët nuk qeshin më ose, të paktën, e bëjnë duke kujtuar goditjet që kanë marrë.
Gary Lineker ka qenë i pari që ka bërë “autoironi” në Twitter, duke cituar mesazhin e publikuar më 13 korrik 2015, kur Claudio Ranieri u zgjodh si trajner i Leicester “Claudio Ranieri? Me të vërtetë?”, ka shkruar atëherë.
Tani tonet kanë ndryshuar, me një pikëpyetje më pak “Claudio Ranieri ka nënshkruar me Leicester si sot një vit më parë. Claudio Ranieri? Po, me të vërtetë”.
Sepse tekniku italian, i cili është nderuar me Urdhrin e Meritës nga Republika Italiane, ka fituar Premier League, duke realizuar një nga arritjet më të mëdha të historisë së futbollit. Në epokën e shpenzimeve milionere, në kampionatin më të pasur të botës me sheikët e Manchester Cityt, Abramovichin Chelseait dhe blerjet e çmendura të Manchester United, ka triumfuar trajneri roman me Vardy, Mahrez dhe të tjerë të panjohur që tani i kërkojnë të gjithë sepse janë kthyer në heronj.
Leicester është grumbulluar dy ditë më parë në Stegersbach, në Austri, me pak mungesa, për shkak të lojtarëve që kanë luajtur me kombëtaret, dhe më i pasur në krahasim me sezonin e kaluar, me katër fytyra të reja: Ren Robert Zieler, portier i marrë nga Hannover (“Do të rivalizojë me Schmeichel, na duhen alternativat”), Luis Hernandez, mbrojtës i datëlindjes 1989 i marrë me kosto zero, dhe mbi të gjithë Papy Mendi dhe Ahmed Musa.
“Papy-n e njoh mirë, – ka thënë Ranieri. – E kam pasur te Monaco, ishte i ri dhe kam qenë unë që e kam marrë në ekipin e parë, me mua ka luajtur shumë ndeshje. Ka një karakter fantastik, është si kante: buzëqesh gjithmonë dhe punën shumë”. Musa ka kushtuar 30 milionë euro, blerje rekord në historinë e klubit: “Na sjell shpejtësi: nuk e di nëse është i shpejtë sa Jamie Vardy, por është e rëndësishme të kesh një aeroplan në ekip. Mos harroni: ne jemi RAF (Royal Air Force) dhe Musa është një nga ata”.
Katër fytyra më shumë, ndoshta ndonjë më pak, nëse Kante do të largohet. “Kam ardhur këtu një vit më parë dhe jam prezantuar me lojtarët. Njihja vetëm Huth sepse e kam pasur te Chelsea, por kemi krijuar një marrëdhënie të mirë që në momentet e para. I shikoja si punonin gjatë stërvitjeve dhe kanë qenë fantastikë. Këtë vit e kemi filluar në të njëjtën mënyrë, me të njëjtin intensitet dhe përqendrim. Shpresoj që të rrinë të gjithë dhe bashkë me të rinjtë të kemi një grup të bukur që do të luftojë deri në fund”, ka thënë Ranieri.