Komisioni i Ministrave për Ndërmarrjet Publike ka zotuar mjetet financiare për fazën përfundimtare të ujësjellësit për Komunën e Mamushës dhe disa fshatra të Përdrinisë në Prizren, teksa është përkrahur edhe projekti i ujësjellësit në Gërnçarë të Prizrenit.
Sipas njoftimit të zëvendësministrit të Ekonomisë, Getoar Mjeku, KRU “Gjakova” ka përfituar “500 mijë euro për fazën përfundimtare të rrjetit të ujësjellësit për vendbanimet Krushë e Madhe, Piranë, Zojz, Medvec dhe Mamushë”.
“Kurse KRU Hidroregjioni Jugor përkrahet me 145 mijë euro për me përmbyllë ujësjellësin në Gërnçarë të Prizrenit”, ka njoftuar Mjeku në rrjetet sociale raporton Telegrafi.
Ndërkaq ndarja e këtyre mjeteve është konfirmuar edhe nga KRU “Gjakova” që ka vlerësuar se ky investim në fshatrat Krushë, Piranë, Zojz, Medvec dhe Komunën e Mamushës “është jetik për përmirësimin e furnizimit me ujë të pijshëm, duke kontribuar drejtpërdrejtë në mirëqenien dhe zhvillimin e këtyre komuniteteve”.
Kryetari i Komunës së Mamushës, Abdylhadi Krasniç ka theksuar se buxheti i nevojshëm për fazën përfundimtare të ujësjellësit është siguruar nga organet qeveritare dhe ka shprehur mirënjohje për angazhimet në këtë drejtim edhe të kreut të KDTP-së, Fikrim Damka.
“Me përfundimin e plotë të këtij projekti, i cili pritet prej 100 vitesh, do të plotësojmë një nga mungesat tona më të mëdha”, është shprehur Krasniç.
Muaj më parë autoritetet komunale të Prizrenit dhe ata të Mamushës patën njoftuar se në bashkëpunim me Kompaninë Rajonale të Ujësjellësit “Gjakova” ka nisur realizimi i projektit që do të mundësojë furnizimin me ujë për disa fshatra të Përdrinisë dhe për Mamushën, dhe se vlera e përgjithshme e projektit është 1.8 milionë euro. /Telegrafi/