Qeveria konservatore e Greqisë ka paraqitur një projektligj në parlament për të zgjatur kufirin e ujërave të saj territoriale në Detin Jon në 12 milje detare, pas negociatave me fqinjët e saj rajonalë – Shqipërinë dhe Italinë.
Projektligji, i paraqitur vonë të premten, do të zgjasë kufirin detar nga gjashtë milje detare. Kjo nuk do të prekë ujërat në Egje, pranë brigjeve jugore dhe lindore të Greqisë, pasi Athina ka mosmarrëveshje me aleatin e saj të NATO-s Turqinë për kufijtë detarë.
Greqia dhe Italia kanë nënshkruar tashmë një marrëveshje mbi kufijtë detarë që krijojnë një zonë ekonomike ekskluzive në Detin Jon, ndërsa Athina dhe Tirana ende nuk kanë rënë dakord për të gjitha detajet e kufirit të tyre detar dhe e kanë referuar çështjen në Gjykatën Ndërkombëtare të Drejtësisë.
Kryeministri grek, Kyriakos Mitsotakis, u takua me homologun e tij shqiptar, Edi Rama në Athinë të premten.
Në projektligj, i cili pritet të votohet më vonë këtë muaj, Greqia thotë se sipas Konventës së Kombeve të Bashkuara 1982 mbi Ligjin e Detit ajo mban të drejtën për të ushtruar të drejtat e saj në pjesë të tjera të territorit të saj.
Në lindje të Greqisë, Turqia ka paralajmëruar se një veprim i ngjashëm nga Athina do të ishte një “shkak për luftë”.
Tensionet mes dy vendeve janë përshkallëzuar, që nga viti i kaluar, mbi burimet e energjisë në Mesdheun lindor, raporton Reuters.
Të dyja vendet ranë dakord disa muaj më parë për të rifilluar bisedimet mbi pretendimet e kontestuara detare në zonë, pas një ndërprerje katër-vjeçare, por asnjë datë nuk u caktua. Shpresat ishin ringjallur për një rinisje të bisedimeve këtë vit. /rel/