Kryetari i Komunës së Bujanocit, Nagip Arifi ka bërë të ditur se tashmë është realizuar transferi financiar me vlerën 200 mijë euro nga Qeveria e Kosovës për komunën që ai drejton.
Këto mjete financiare do të përdoren për të sanuar dëmet e shkaktuara nga vërshimet në Bujanoc.
“Sot, realizuam edhe një transfer financiar me vlerë prej 200.000 € nga Qeveria e Republikës së Kosovës. Ky transfer u realizua duke u bazuar në kërkesën tonë drejtuar kryeministrit Hoti për sanimin e dëmeve nga vërshimet e fundit që përfshinë komunën tonë. Mjetet e marra do të shfrytëzohen për sanimin dëmeve infrastrukturore, duke filluar nga Malësia e Bujanocit e këndej”, shkruan Arifi.
Ai ka falënderuar Qeverinë e Kosovës për këtë ndihmë dhe personat përgjegjës të cilët e kanë realizuar transferin.
“Shfrytëzoj rastin të falënderoj Qeverinë e Republikës së Kosovës, kryeministrin në detyrë, deputetin e Parlamentit të Kosovës Faton Bislimin për insistimin e tij të vazhdueshëm, si dhe një falënderim të posaçëm për drejtorin e Thesarit të Kosovës Ahmet Ismajli për angazhimin e tij të pakursyer që mjetet të transferohen sa më shpejt”, shkruan Arifi. /Telegrafi/
