“Rezultati i bisedës telefonike mes presidentëve të Serbisë dhe Rusisë na e bëri të qartë se bëhet fjalë për një mjek apo diler dhe një narkomani që ka ardhur deri te droga”.
Kështu ka vlerësuar analisti politik Dushan Janjiq rreth një paraqitje të presidentit të Serbisë, Aleksandar Vuçiq, pas një bisede telefonike të këtij të fundit me presidentin rus, Vladimir Putin.
Gjatë kësaj paraqitje, Vuçiq ndër tjera ka theksuar se është pajtuar me presidentin rus, për një çmim jashtëzakonisht të favorshëm të gazit për Serbinë.
“Putini, natyrisht, do të vazhdojë t’i japë kokainë atij të droguarit me çmim të lirë, dhe me çmimin më të mirë, por me një çmim mesatar, në mënyrë që ta mbajë të varur”, citohet të ketë thënë për mediumin serb Danas, Dushan Janjiq, përcjell Telegrafi.
“Ne nuk kemi asgjë për të fajësuar Rusinë, Putini ka krijuar narkomanë dhe të varur që kur ka ardhur në pushtet përmes lëndëve djegëse fosile, naftës dhe pastaj e përdor kundër tyre sepse është i vetëdijshëm se nuk ka armë të tjera mbrojtjeje kundër teknologjisë dhe NATO-s. Tani vërtet nuk jam i sigurt se Vuçiq po e udhëheq Serbinë në interes të saj, nuk jam i sigurt se ai e di se ku po shkon, por e di që po e tërheq Serbinë në kohën kur Sllobodan Millosheviqi sundoi Serbinë – Vuçiq po e tërheq Serbinë në vetëizolim. Është e rrezikshme. Dhe ky është interesi i Rusisë, jo i Serbisë”, citohet të ketë thënë ndër tjerash Dushan Janjiq.
Ndryshe, ndërsa agresioni rus në Ukrainë vazhdon, presidenti i Serbisë njoftoi se ka siguruar një marrëveshje “jashtëzakonisht të favorshme” të gazit natyror me Rusinë gjatë një bisede telefonike të dielën me presidentin rus Vladimir Putin.
Marrëveshja e gazit ka të ngjarë të nënshkruhet gjatë një vizite të ministrit të Jashtëm rus, Sergej Lavrov në Beograd në fillim të qershorit – një vizitë e rrallë e një zyrtari të lartë rus në një vend evropian që nga fillimi i agresionit rus mbi Ukrainë më 24 shkurt.
Serbia është pothuajse tërësisht e varur nga gazi rus dhe kompanitë e saj kryesore të energjisë janë nën pronësinë e shumicës ruse.
“Ajo që mund t’ju them është se ne kemi rënë dakord për elementët kryesorë që janë shumë të favorshëm për Serbinë”, citohet t’u ketë thënë gazetarëve Vuçiq, një ish-ultranacionalist pro-rus.
“Ne ramë dakord të nënshkruajmë një kontratë trevjeçare, e cila është elementi i parë i kontratës që i përshtatet shumë palës serbe”.
Megjithatë, nuk është e qartë se si Serbia do ta merrte gazin rus nëse BE-ja vendos të mbyllë furnizimin rus që “lëvizë” përmes vendeve të saj anëtare. /Telegrafi/