Paris Saint-Germaini ka luajtur baras me rezultat 1-1 në shtëpi ndaj Nantes në kuadër të javës së 13-të në elitën e futbollit francez.
Vendasit arritën të shënojnë herët në këtë takim, duke realizuar që në minutën e dytë përmes Achraf Hakimit i cili çoi topin në rrjetë për 1-0.
PSG-ja pati mundësinë që ta shënojë edhe golin e dytë në minutën e dhjetë përmes Vitinhas, por atij iu mohua goli nga portieri Patrik Carlgren.
Mysafirët ia dolën të barazojnë rezultatin në rastin e tyre të parë përmes Matthis Abline që shënoi për rezultatin 1-1 në minutën e 39-të.
Kampioni në fuqi vazhdoi përpjekjet edhe në pjesën e dytë për ta gjetur golin e fitores, por në fund nuk ia dolën të bëjnë këtë.
Rastin më serioz në pjesën e dytë e pati mesfushori Warren Zaire-Emery i cili gjeti pak hapësirë brenda zonës së rrezikshme por goditjen e tij e ndali sërish Carlgren.
Deri në fishkëllimën e fundit të gjyqtarit nuk pati më ndonjë rast për t’u veçuar dhe PSG-ja u desh të pajtohej me vetëm një pikë nga ky takim.
Pas javës së 13-të, PSG-ja vazhdon si lider i tabelës me 33 pikë të grumbulluara, shtatë më shumë se Monaco në vendin e dytë që ka 26 sosh por që kanë një ndeshje më pak të zhvilluar./Telegrafi/