Katër konsorciume kanë hyrë në garë për ndërtimin e termocentralit Kosova e Re. Ofertuesit e para-kualifikuar për inxhinierim, projektim, ndërtim dhe mirëmbajtje për projektin e termocentralit Kosova e Re janë 1. CMEC; 2. Një konsorcium i përbërë nga ENKA, Mitsubishi Hitachi Power Systems dhe Técnicas Reunidas; 3. Një konsorcium i kompanive të General Electric; dhe 4. Hyundai.
Pas shpalljes së procesit të ‘Përzgjedhjes Fillestare’ në qershor, gjashtë aplikime u pranuan dhe u vlerësuan nga Contour Global. Rezultatet dhe vendimin e Contour Global e ka njohur Qeveria e Kosovës. Gjatë fazës së parakualifikimin kanë aplikuar gjatë kompani, mirëpo pas procesit të vlerësimit është arritur në përfundimin se katër prej këtyre janë parakualifikuar, të cilët i kanë plotësuar kriteret e larta teknike dhe financiare, si dhe i kanë ofruar letrat e financimit nga institucionet financiare.
CMEC
China Machinery Engineering Corporation (CMEC) është themeluar mbi paraardhësen e saj ‘China National Machinery & Equipment Import & Export Corporation’, e cila u krijua në vitin 1978.
Me më shumë se 30 vjet eksperiencë në industrinë e inxhinierisë, CMEC ka zgjeruar praninë e saj të biznesit në 47 vende dhe rajone në Azi, Afrikë, Evropë dhe Amerikë Jugore, duke formuar një sistem kontraktues të projektit me energji elektrike dhe duke mbuluar transportin, telekomunikacionin, ujësjellësin, materialet e ndërtimit dhe çimentos, etj.
Në shkurt të vitit 1983, CMEC fitoi mundësinë për të ndërtuar një stacion termocentrali 210 MW në Guddu të Pakistanit.
Me të hyrë në shekullin e 21, CMEC u bë kompania e parë që prezantoi gjeneratorin kinez superkritik të prodhuar me qymyr 600 MW në tregun ndërkombëtar.
I quajtur si Projekti Tre Gorges i Republikës së Kongos, Hidrocentrali Imboulou 4 x 30 MW u përfundua dhe u vu në punë në vitin 2010.
CMEC ka filluar në industrinë e inxhinierisë jashtë vendit në vitin 1980 dhe prej atëherë ata kanë marrë projekte në më shumë se 45 vende anembanë botës. Që nga fillimi i tyre CMEC ka marrë mbi 80 projekte kontraktuese inxhinierike në sektorin e energjisë.
ENKA, Mitsubishi Hitachi Power Systems dhe Técnicas Reunidas
ENKA është themeluar nga në vitin 1957 dhe është një kompani globale inxhinierike dhe ndërtimi me seli në Stamboll të Turqisë.
Duke qenë një kompani holding, ENKA ofron shërbime nëpërmjet degëve të saj në fushat e mëposhtme, inxhinieri dhe konstruksion, prodhim të energjisë, pasuri të patundshme dhe tregti.
ENKA është renditur në mesin e markave më të vlefshme të Turqisë. Ajo ka pasur një qarkullim prej 2.9 miliardë dollarëve në vitin 2017.
Të dhënat tregojnë se deri më tani ENKA ka përfunduar 123 projekte në Turqi me vlera të kontratave prej 7 miliardë dollarë dhe 393 projekte me vlera të kontratave prej 38,5 miliardë dollarë i janë dhënë ENKA-së në vendet e huaja.
Kompania ENKA është e njohur në Kosovë, pasi ishte pjesë e konsorciumit me kompaninë amerikane Bechtel e cila ka ndërtuar dy autostradat e Kosovës, të cilat kanë kushtuar mbi 1,5 miliardë euro. Të dy tenderët për ndërtimin e Autostradave janë përfolur shumë në Kosovë për çmime shumë të larta, e së fundi edhe për pagesën e 53 milionë eurove shtesë. Kontratat e lidhura për këto Autostrada nuk janë publikuar asnjëherë.
ENKA Power është themeluar në vitin 1997 me partneritet mes ENKA-së dhe InterGen.
ENKA ka prodhuar mbi 400 miliardë kWh energji elektrike në Turqi gjatë periudhës 14 vjeçare të operimit të tyre komercial. Me kapacitetin e tyre kolektiv vjetor të prodhimit prej 32 miliardë kWh, centralet janë të afta të plotësojnë 11 për qind të konsumit total të energjisë së Turqisë.
Mitsubishi Hitachi Power Systems (MHPS) filloi me ndarjen e divizioneve për prodhimin e energjisë termike të Mitsubishi Heavy Industries Ltd dhe Hitachi, Ltd. Si një kompani në fushën e sistemeve të prodhimit të energjisë termike dhe teknologjisë mjedisore, MHPS mund të trajtojnë të gjithë procesin e prodhimit nga zhvillimi, projektimi, prodhimi, ndërtimi dhe komisionimi në shërbimin e pas-shitjes për termocentralet.
Kapitali i kësaj kompanie është 100 miliardë yen dhe ka 18 mijë e 675 të punësuar.
Disa nga projektet e tyre më të mëdha në fushën e energjisë janë termocentralet e centralizuara të turbinës me gaz (GTCC), termocentralet konvencionale, termocentralet e centralizuara të gazifikimit të qymyrit të integruar (IGCC), termocentralet gjeotermale, turbinat me gaz, turbinat e avullit, bojlerët, sistemet e kontrollit të cilësisë së ajrit (AQCS), pajisjet e prodhimit të energjisë elektrike periferike.
Técnicas Reunidas (TR) është produkt e ish-degës spanjolle të kompanisë Lummus, Lummus Española, S.A., e themeluar në vitin 1960. Në vitin 1972, një grup spanjoll i investitorëve bleu 100% të aksioneve të Lummus Española dhe riemërtoi kompaninë në Técnicas Reunidas.
Që nga viti 1960, TR ka projektuar dhe ndërtuar më shumë se 1,000 centrale industriale në mbarë botën.
TR ka zhvilluar projektet në mbi 50 vende që mbulojnë gjashtë kontinente. Projektet ndërkombëtare përbëjnë 78 për qind të qarkullimit vjetor të kompanisë.
TR ka përfshirë sistemet dhe teknologjitë më të avancuara bazuar në gjeneratën më të fundit të mjeteve të përpunimit të të dhënave për të menaxhuar dhe dizajnuar projektet. Më shumë se 5,500 profesionistë janë trajnuar dhe kanë përvojë praktike të nevojshme për menaxhimin e këtyre projekteve.
TR zhvillon të gjitha planet me sisteme 3D dhe si i tillë është në gjendje të prodhojë ‘modele të centraleve tredimensionale’ të cilat eliminojnë problemet potenciale. TR ka përvojë të gjerë në sektorin e prodhimit të lëndëve djegëse fosile, duke përfunduar projekte të shumta në impiantet e qymyrit (linjit, antracit), naftë, si dhe gaz natyror dhe biomasë duke përdorur teknologji të ndryshme.
Përvoja në këtë sektor ka lejuar që TR të jetë një referencë me praninë ndërkombëtare në Evropë dhe Lindjen e Mesme, duke arritur përfshirje në më shumë se 22 mijë MW të fuqisë së instaluar në ciklin e kombinuar.
General Electric
General Electric është themeluar në vitin 1892 nga Thomas Edison, Charles A. Coffin, Elihu Thomson, Edwin J. Houston dhe J. P. Morgan. Tashmë General Electric është një konglomerat multinacional i cili ka selinë në Boston.
126 vjet që nga themelimi ‘General Electric’ operon në disa sektorë të ndryshëm, në aviacion, shëndetësi, energji, energji e rinovueshme, prodhimi digjital, prodhimi shtesë, capital dhe financa, ndriçim, transport, naftë dhe gaz.
Në vitin 2018 revista Forbes, e ka radhitur konglomeratin General Electric të 388-në në mesin e kompanive 2 mijë kompanive më të mëdha në botë, me vlerën e tregut prej 126.8 miliardë dollarë.
Në kuadër të konglomeratit General Electric operon kompania GE Power e cila është biznesi më i madh i energjisë në GE me rreth 38 mijë punonjës që u shërbejnë klientëve në më shumë se 125 vende.
“Ne punojmë në të gjithë industrinë e energjisë nga burimet e ripërtëritshme, në karburantet alternative të qymyrit, gazit natyror dhe energjisë bërthamore”, thuhet në faqen e GE Power.
Hyundai
Hyundai Group është një konglomerat me seli në Seul të Koresë së Jugut. Ajo u themelua nga Chung Ju-yung në vitin 1947 si një firmë ndërtimi dhe Chung ishte drejtor i kompanisë deri në vdekjen e tij në 2001.
Pas krizës financiare aziatike të Azisë Lindore dhe vdekjes së Chung, Hyundai iu nënshtrua një ristrukturimi dhe shpërbërje të madhe, gjë që e zvogëloi biznesin e Grupit Hyundai për të përfshirë vetëm shërbimet e kontejnerëve të anijeve, prodhimin e ashensorëve dhe turizmin.
Sot, shumica e kompanive që mbajnë emrin Hyundai nuk janë të lidhur ligjërisht me Hyundai Group. Ato përfshijnë Hyundai Motor Group, Hyundai Department Store Group, Hyundai Heavy Industries Group dhe Hyundai Development Company. Megjithatë, shumica e filialeve të mëparshme të konglomeratit Hyundai vazhdojnë të drejtohen nga të afërmit e Chung.
Hyundai Motor është radhitur e 147-ta nga revista Forbes në mesin e 2000 kompanive më të mëdha në botë. Sipas kësaj reviste, Hyundai Motor ka një vlerë tregu prej 31.6 miliardë dollarë.
Nëse këto kompani do të konsideroheshin si një biznes i vetëm familjar, atëherë ajo do të ishte kompania më e madhe në Korenë e Jugut me fuqi të madhe ekonomike dhe politike në vend.
Nga mesi i viteve 1990, Hyundai përbëhej nga mbi 60 kompani ndihmëse dhe ishte aktiv në një gamë të larmishme aktivitetesh, duke përfshirë prodhimin e automobilave, ndërtimin, kimikatet, elektronikën, shërbimet financiare, industrinë e rëndë dhe ndërtimin e anijeve.
Në të njëjtën periudhë kishte të ardhura vjetore prej rreth 90 miliardë dollarë dhe mbi 200 mijë punonjës.
Nënshkrimi i marrëveshjes 1.3 miliard euro mes qeverisë së Kosovës dhe Joseph Brandt, drejtorit ekzekutiv të kompanisë amerikane ‘Countur Global’ është bërë me 20 dhjetor 2017.
Është parashikuar që në vitin 2019 do të vihet gurthemeli i termocentralit Kosova e Re. /Kallxo/