Dëmtimet e infrastrukturës rrugore në Komunën e Gjakovës vazhdon të jetë një ndër sfidat që raportohet më së shumti nga qytetarët e kësaj komune në platformën Ndreqe.com.
Së fundmi në këtë platformë është raportuar për dëmtime të trotuarit në rrugën ‘Ganimete Tërbeshi’ , rrugë e cila është një kahore, e që dëmtimi i trotuarit në këtë pjesë sjell edhe më shumë probleme dhe rrezikshmëri për qytetarët, sepse për shkak të rrugës e cila është e ngushtë, si pasojë e dëmtimit të trotuareve në këtë zonë, qytetarët detyrohen të ecin në rrugë.
Përveç kësaj zone ku trotuarët janë pothuajshe të pakalueshëm, në Ndreqe.com është raportuar edhe për dëmtim të trotuarit në rrugën ‘Sefedin Xërxa’, ku në këtë anë janë larguar shtyllat të cilat ua ndalonin makinave ndaljen në trotuar.
Ndërsa një problem tjetër është raportuar nga banorët e fshtatin Bec, ku në udhëkryqin e këtij fshati, është ndërprerë rregullimi i rrugës, duke u bërë prerja e asfaltit, gjë e cila ka ndikuar që në këtë pjesë të rrugës të krijohet një gropë e madhe, e cila është një problematikë mjaft shqetësuese për drejtuesit e makinave që lëvizin në këtë anë.
Qytetarët po vazhdojnë të raportojnë në platformën Ndreqe.com për ankesat që kanë, ku më pas po intervenohet edhe nga organet përgjegjëse.
Vazhdoni të raportoni edhe më tutje për të gjitha problemet në komunat tuaja përkatëse. /Telegrafi/