Komuna e Prizrenit sivjet ka ndarë 90 mijë euro për subvencionimin e mbi 15 organizatave joqeveritare, të cilat zbatojnë projekte në fushat sociale. Kjo shumë e mjeteve është vlerësuar si e pamjaftueshme nga aktivistët e shoqërisë civile, por edhe nga zyrtarët e lartë komunalë.
Drejtoresha e organizatës “Handikos” në Prizren, Merita Shala ka vlerësuar subvencionimin nga Komuna si diçka të domosdoshme për shërbimet që ofrohen për personat me aftësi të kufizuara.
“Përkrahja nga Komuna e Prizrenit për “Handikosin” që është licencuar nuk është aq e mjaftueshme sepse kemi nevoja të vazhdueshme”, ka thënë Shala, pas nënshkrimit të kontratës me drejtuesit e komunës, raporton Telegrafi.
Sipas saj në këtë organizatë brenda javës kryhen 50 deri në 60 shërbime në javë, derisa subvencionet e ndara nga Komuna mjaftojnë për një periudhë 3-4 mujore.
“Pjesën tjetër të vitit duhet mbuluar me punë vullnetare”, është shprehur Shala, duke shtuar se kjo shoqatë ka mbi dy mijë anëtarë në Komunën e Prizrenit, teksa nga shërbimet nuk i përjashtojnë as të moshuarit apo rastet sociale.
Drejtori për Punë dhe Mirëqenie Sociale, Rasim Demiri ka theksuar se ka pasur shumë aplikime, dhe se janë përzgjedhur mbi 15 organizata që janë të licencuara për ofrimin e shërbimeve sociale, që do të subvencionohen me gjithsejtë 90 mijë euro.
“Jemi të vetëdijshëm se kanë nevojë më shumë, por kjo është mundësia jonë financiare”, ka thënë Demiri.
Ngjashëm edhe kryetari i Komunës, Shaqir Totaj ka pohuar se qëllimi i organeve komunale është që përmes subvencioneve të përkrahen organizatat që merren me shërbime sociale për kategoritë e personave me aftësi të kufizuara dhe të tjerët.
“Nevojat e tyre janë shumë të mëdha, por ne me aq sa kemi mundësi dëshirojmë të përçojmë mesazhin se qëndrojmë pranë tyre. Natyrisht, vlerat e subvencioneve çdo vit po rriten, dhe shpresojmë se vitin e ardhshëm do të ketë më shumë mjete”, ka thënë ai. /Telegrafi/