Turneu tradicional i futsallit “Prishtina Tournament” ka përfunduar thuajse të gjitha përgatitjet edhe për një edicion fantastik në fund të vitit.
“Prishtina Tournament” zhvillon sivjet edicionin e tretë në futsall dhe data e nisjes veçse është afruar.
Organizatorët kanë njoftuar se turneu i sivjetmë fillon me datë 23 dhjetor dhe përfundon me finalen e madhe më 30 dhjetor.
Paraqitja e ekipeve po shkon drejt fundit, pasi kanë mbetur edhe shumë pak vende të lira në turneun që zhvillohet në sallën e Pallatit të Rinisë dhe Sporteve në kryeqytet.
Dy edicionet e para janë fituar nga ekipet “Mercedes Arditi” dhe “Bjorn”.
Ky turne është interesant edhe për faktin se përveç garës së madhe për ekipet seniorë, luajnë edhe ekipe të shkollave të fundit, ekipe të femrave, personat me nevoja të veçanta, por edhe ndeshje revyale mes ushtarëve, policëve, gazetarëve, ambasadave etj.
“Prishtina Tournament” mbështetet edhe nga Komuna e Prishtinë dhe Federata e Futbollit e Kosovës. /Telegrafi/
